Kulingana na Shirika la Kimataifa la Miliki Bunifu(WIPO), hatazani "hati inayoeleza uvumbuzi ambao unaweza kutengenezwa, kutumiwa na kuuzwa kwa idhini ya mmiliki wa hataza. Uvumbuzi ni suluhisho la tatizo mahususi la kiufundi."

Ubunifu pia hulindwa na Mfumo wa Mfano wa Matumizi, unaojulikana pia kama “hataza ndogo” au “ubunifu wa matumizi”. Masharti ya usajili wa mifano ya matumizi kwa kawaida si makali sana (kwani hakuna hatua ya kiuvumbuzi inayohitajika au inahitajika hatua ndogo tu ya kiuvumbuzi). Utaratibu wa usajili ni wa haraka zaidi (kwani uvumbuzi mpya na hatua ya kiuvumbuzi kwa kawaida hazikaguliwi kabla ya usajili) na ada za kupata na kudumisha kwa ujumla ni ndogo kuliko zile zinazotumika kwa hataza. Usajili wa Mfano wa Matumizi unakusudiwa kulinda ubunifu wa wenye haki.

Muundo hurejelea sifa za umbo, mpangilio, mchoro au mapambo ambazo huipa bidhaa mwonekano wa kipekee na lazima ziwe mpya na za kipekee. Muundo wa viwanda ni mchakato wa usanifu unaotumika kwa bidhaa zitakazotengenezwa kwa mbinu za uzalishaji wa wingi. Usajili wa muundo unakusudiwa kulinda miundo yenye matumizi ya viwandani au ya kibiashara.

Alama ya biashara ni ishara au kiashiria cha kipekee kinachotumiwa na mtu binafsi, shirika la biashara au chombo kingine chochote cha kisheria kuwatambulisha watumiaji kwamba bidhaa au huduma zenye alama hiyo zinatoka katika chanzo kimoja cha kipekee, na kutofautisha bidhaa na huduma zake na zile za vyombo vingine.