Ubu buryo bureba imiryango ishaka guteza imbere ikibanza gishya cyabonetse nk'Akarere Kihariye k'Ubukungu. Ubusabe bwo kugenwa kw'Akarere bushobora gutangwa n' inzego z'abikorera, iza Leta cyangwa iz'ubufatanye bwa Leta n'abikorera kandi butangwa kuri SEZAR-RDB kugira ngo busuzumwe kandi bugirweho inama zigezwa ku Nama y'Abaminisitiri.

Uturere Twihariye tw'Ubukungu mu Rwanda dushyirwaho n'iteka rya Minisitiri w'Intebe rihindura ahabigenewe Akarere kagenwe n'amategeko.

Usaba wese, yaba uwo mu rwego rw'abikorera cyangwa uwo mu rwego rwa Leta, ushaka guteza imbere, gukoresha, kubungabunga cyangwa kwamamaza Akarere Kihariye k'Ubukungu agomba gutanga ubusabe kuri SEZAR. Umuyobozi wa SEZAR atanga Impushya z'Uteza imbere / Ukoresha Akarere amaze kubona ko Inama y'Ubutegetsi ya SEZAR yabyemeje.

Iyo Akarere kagiye guterezwa imbere no gukoreshwa ku mutungo bwite wa Leta n'umushoramari wigenga wo mu gihugu cyangwa w'umunyamahanga, kabone n'iyo byaba binyuze mu Bufatanye bwa Leta n'Abikorera, SEZAR itangaza ubutumire bwo kugaragaza ubushake kugira ngo hatoranywe uteza imbere umwe cyangwa benshi na / cyangwa ukoresha umwe cyangwa benshi.

Ukorera mu Karere Kihariye k'Ubukungu ni ikigo cyigenga gikora ibikorwa by'ubucuruzi muri SEZ kandi cyubahiriza amategeko n'amabwiriza agenga SEZ akurikizwa. SEZAR igomba gutanga cyangwa kwanga gutanga uruhushya rw'ukorera mu Karere mu minsi 3 y'akazi uhereye ku munsi ubusabe bwuzuye butangiweho. Ukorera muri SEZ agomba kuba afite imimerere ya SEZ mu buryo bw'uruhushya rutangwa n'Ikigo.

Hakurikijwe "Itegeko rya Gasutamo ry'Afurika y'Iburasirazuba", Akarere k'Inganda Zitunganya Ibyoherezwa mu Mahanga (EPZ) ni agace ka gasutamo aho umuntu yemererwa gutumiza ibikoresho by'uruganda, imashini, ibikoresho n'ibikoresho fatizo bigenewe gukora ibicuruzwa byoherezwa mu mahanga, bifite ingwate, nta kwishyura imisoro ya gasutamo. Ibicuruzwa byatumijwe bigengwa na gasutamo guhera igihe byinjiriye, mu gihe cyo kubitunganya, kugeza igihe bigurishirijwe/byoherejwe mu mahanga cyangwa kugeza igihe hishyuriwe imisoro ya gasutamo kugira ngo bikoreshwe mu gihugu.

Izindi nyungu zo gukora ibyo bigo birimo; imiterere y'ubucuruzi bwisanzuye, koroshya inzira z'ubutegetsi bwa Leta bituma habaho iyandikwa no gutanga uruhushya ahantu hamwe ndetse na koroherezwa mu isonerwa ry'imisoro mu gihe kirekire.